Tranndezyèm Dimanch TAN ÒDINÈ

Sèvis pawòl la: (Ane B)

““Granmèt, panche zòrèy ou pou ou koute rèl mwen””

 

PREMYE LÈKTI

Lèkti  premye liv Wa yo   17, 10-16

Jou sa yo, pwofèt Eli leve, li ale Sarepta. Lè li rive nan pòt lavil la, gen yon vèv ki parèt devan li, madanm nan t ap ranmase bwa; Eli rele li, li di li: ‘‘Banm ti gout dlo nan yon veso pou mwen ka bwè’’. Pandan madanm nan ap prale chèche dlo a, Eli rele li, li di li: ‘‘Tanpri pote yon ti moso pen pou mwen.’’ Madanm nan reponn: ‘‘Sou lavi Granmèt la, Bondye ou an, mwen pa gen pen, sof yon ti ponyen farin nan yon mamit ak yon ti gout lwil nan yon boutèy. Se ti bwa m ap ranmase pou mwen fè yon dife, pou mwen ka fè yon pat pou mwen ak pitit mwen an, pou nou manje, apre sa pou nou mouri.’’  Eli di li: ‘‘Ou pa bezwen pè, ou mèt ale, fè jan ou di a; sèlman ak farin nan, kòmanse fè yon pen wa kwit anba sann pou mwen, epi pote li ban mwen, apre sa, wa fè pou ou ak pou pitit ou an.  Sèke men sa Granmèt la, Bondye Izrayèl la di: ‘Mamit farin nan pap manke, boutèy lwil la pap bese, jous jou Granmèt la ap voye lapli sou fas tè a.’’’ Madanm nan ale, li fè jan Eli  di li a. Konsa li vin gen pen pou li manje ni li menm, ni moun lakay li pandan tout ane yo ki te gen grangou yo; mamit farin nan pa manke ni boutèy lwil la pa janm bese, dapre pawòl Granmèt la te di pa lantremiz Eli a.

Pawòl Granmèt la.

 

SÒM REPONS 146:7, 8-9, 9-10

R/ Se pou nanm mwen chante lwanj pou Granmèt la!

1. Granmèt la rete fidèl pou tout tan, li fè sila yo y ap maspinen yo jwenn jistis la, sila yo ki grangou yo, li ba yo pen pou yo manje; li delivre sila yo ki anba chenn yo. R/

2. Granmèt la fè avèg yo wè, li fè sila yo ki koube yo kanpe dwat, Granmèt la renmen sila yo ki kòrèk yo, Granmèt la proteje moun vini yo. R/

3. Li pwoteje vèv yo ak òfelen yo, li gaye moun k ap fè mechanste yo Granmèt la etabli rèy li pou tou tan: Se li menm ki Bondye ou pou tout tan – Siyon! R/

 

DEZYÈM LÈKTI

Lèkti lèt pou Ebre yo  9, 24-28

Jezi pat antre nan yon kay sakre ki fèt ak men moun, nan pòtrè bagay ki vrè yo, men se nan syèl la li menm li antre pou li parèt kounye a devan fas Bondye pou nou; se pa pou li kapab ofri tèt li anpil fwa, tankou prèt an chèf la ki oblije antre chak ane nan kay sakre a ak san ki pa pou li, otreman li t ap oblije soufri anpil fwa depi kòmansman tè a. Men koulye a, se yon sèl fwa pou tout, jous nan  finisman syèk tan yo, li parèt pou li detwi peche a. Menm jan destine tout moun se pou yo mouri yon sèl fwa, epi apre sa, pou yo parèt pou jijman an, konsa tou Jezi Kri ofri tèt li yon sèl fwa pou li efase peche tout foul moun yo, apre sa, l ap parèt yon dezyèm fwa, pa pou li wete peche a, men pou li pote delivrans moun yo k ap tann li yo.

Pawòl Granmèt la!

 

Aklamasyon   Jn. 3, 16

Alelouya, alelouya. R/ Se chans pou moun ki pòv nan lespri a, paske se pou yo peyi Wa syel yo ye. Alelouya, alelouya. R/

 

LEVANJIL

Men Bon Nouvèl Jezi Kri nan Levanjil ki daprè Mak  12, 38-44

Lè sa, Jezi t ap anseye moun yo, li t ap di: ‘‘Fè atansyon ak pwofesè yo, ki renmen pwonmennen nan gran manto, epi ki renmen pou moun salye yo sou laplas la, yo renmen chita nan premye plas nan sinagòg yo, yo renmen plas dònè nan resepsyon yo; y ap devore byen vèv yo, etan y ap fè sanblan se lapriyè y ap lapriyè: moun sa yo ap resevwa pinisyon ki pi rèd.’’ Nan moman sa a, Jezi te chita nan tanp lan, anfas sal kèt la; l ap gade kijan foul la t ap mete lajan nan kèt la; anpil moun rich t ap mete anpil lajan. Yon pòv vèv vin rive, li mete de ti pyès, ki vo vennsenk santim. Jezi rele patizan li yo, li di yo: ‘‘Anverite mwen di nou, pòv vèv sa mete plis pase tout moun ki mete lajan nan kèt la; sèke tout moun, se nan sa yo genyen twòp la yo bay; li menm menm se nan ti sa ki pa menm kont pou li a li pran, tou sa li te genyen, li bay li, tou sa li te bezwen pou li viv la’’.

Annou fè lwanj ak konpliman pou pawòl Granmèt la!

 

== ==

 

PRIYÈ KOMINOTÈ

Dimanch 10 Novanm 2024

 (Ane B)

““Renmen se bay tout sa ou genyen””

 

1- Pou legliz la

Pinga nou gen kè sote lè lavi a ap maltrete nou, sèlman mete konfyans nou nan Granmèt la. N ap lapriyè pou Pap François, pou Evèk yo, pou Pè yo ak pou Dyak yo. Ann mande Bondye pou l bayo menm pèseverans ak pwofèt Eli, konsa menm lè yo va jwenn pèsekisyon, yo va kontinye preche levanjil la toupatou kote yo pase.

Annou lapriyè.

 

2- Pou lidè yo

Lè nou itilize richès nou pou n ede moun ki nan bezwen yo, nou jwenn favè nan men Bondye. N ap lapriyè pou dirijan yo, pou tout moun ki gen responsablite politik, sosyal, ak ekonomik. Ann mande Bondye pou l mete jenerozite nan kè yo pou yo amelyore lavi sosyete a pou gen pataj, lapè, ak lajistis.

Annou lapriyè

 

3- Pou Malad yo

Jezi se sila ki kraze lanmò pou li bannou lavi, e li fè nou tounen pitit adoptif Bondye. N ap lapriyè pou tout moun ki malad nan kominote nou an, pou tout vèv yo, pou tout moun ke pitit ak fanmi abandone. Ann mande Bondye pou l geri yo e bayo lesperans ke yon jou yo va jwenn delivrans gras ak lafwa yo.

Annou lapriyè!

 

4- Pou Jèn yo

Lafwa se kwè, men se met konfyans nou nan Bondye ak nan pawòl li. N ap lapriyè pou jèn nan kominote nou an, ak pou tout jèn ki lage kò nan vyolans, dwòg, plezi ak banbòch. Ann mande Bondye pou l ogmante lafwa yo konsa y a aprann viv selon pawòl li yo.

Annou lapriyè.

 

5- Pou kominote nou an

Aparans twonpe kretyen vivan, men li pa ka twonpe Granmèt la, paske li konnen sa k nan kè nou. N ap lapriyè pou kominote nou an, pou gwoup ak layik angaje yo. An n mande Bondye pou l mete lespri pataj nan kè yo, konsa menm jan ak vèv sa yo, n a aprann bay sa nou genyen ak tout imilite e jenerosite.

Annou lapriyè!